Электрыфікацыя і электразабеспячэнне

Гаспадарка электрыфікацыі і электразабеспячэння ўключае ў сябе 7 дыстанцый электразабеспячэння: Мінскую, Баранавіцкую, Брэсцкую, Гомельскую, Магілёўскую, Віцебскую і Аршанскую. Адна з іх, Віцебская, абслугоўвае неэлектрыфікаваныя ўчасткі чыгункі. У гаспадарцы электрыфікацыі і электразабеспячэння ёсць 24 цягавыя падстанцыі, з іх 2 цягавыя падстанцыі пастаяннага току, кантактную сетку абслугоўвае 31 раён кантактнай сеткі, ўстройства і сеткі электразабеспячэння абслугоўваюць 18 раёнаў электразабеспячэння.

Эксплуатацыйная даўжыня электрыфікаваных участкаў чыгункі – 1369,0 км, што складае 25% ад агульнай працягласці, у тым ліку на пераменным току напружаннем 27,5 кВ і 2х25 кВ – 1342,6 км і на пастаянным току напружаннем 3,3 кВ – 26,4 км. Разгорнутая даўжыня кантактнай сеткі – 3973,2 км. Даўжыня паветраных ліній электраперадачы 6-10 кВ складае 7195,9 км, кабельных ліній 6-10 кВ – 1409,1 км. Колькасць работнікаў у гаспадарцы складае 1547 чалавек.

Асноўныя задачы гаспадаркі электрыфікацыі і электразабеспячэння – надзейнае электразабеспячэнне аб'ектаў і ўстройстваў транспартнай інфраструктуры чыгункі, забеспячэнне бесперабойнай працы ўстройстваў тэхналагічнага электразабеспячэння (цягавыя падстанцыі, пасты секцыяніравання кантактнай сеткі, аўтатрансфарматарныя пункты,ўстройства кантактнай сеткі, трансфарматарныя падстанцыі, паветраныя і кабельныя лініі электраперадачы), развіццё гаспадаркі электразабеспячэння на аснове перадавых дасягненняў у галіне электраэнергетыкі і чыгуначнага транспарту.

Асноўнымі напрамкамі у развіцці гаспадаркі электрыфікацыі і электразабеспячэння з'яўляюцца электрыфікацыя чыгуначных участкаў, мадэрнізацыя існуючых электрыфікаваных чыгуначных участкаў, засваенне сучаснага абсталявання і тэхналогій, рэканструкцыя існуючых прылад тэхналагічнага электразабеспячэння, укараненне найноўшых сістэм кіравання прыладамі электразабеспячэння, дыягностыкі электратэхнічнага абсталявання і ўліку спажыванай электрычнай энергіі.